Në fshatin Llugë të Podujevës është përuruar sot shtatorja e heroit të kombit, Afrim Zhitia, ndërsa u rinovua edhe obelisku dhe hapësira përreth tij.

Me këtë rast, kryeministri në detyrë i Kosovës, Albin Kurti, theksoi rëndësinë e kujtesës historike dhe nderimit të figurave që dhanë jetën për lirinë e vendit. Ai rikujtoi rezistencën e Afrim Zhitisë dhe Fahri Fazliut, të cilët luftuan deri në frymën e fundit.

“Shoqëritë më përparimtare kanë ditur të ruajnë kujtesën për ngjarjet dhe personalitetet që i kanë shënuar ato. Sot, në vendlindjen e Afrimit, po shtohet një vepër monumentale që do të kujtojë përherë heroizmin e tij dhe të brezit që sakrifikoi për Kosovën”, u shpreh Kurti.

Ai shtoi se përveç akademive përkujtimore të mbajtura ndër vite, tash edhe vendlindja e Zhitisë po pasurohet me një skulpturë që do të mbetet shenjë e gjallë e respektit dhe mirënjohjes së përjetshme.