Një shpërthim me lëndë plasëse ka ndodhur mëngjesin e së premtes në Kamëz.

Sipas burimeve të euronews.al bëhet e ditur se lënda plasëse është vendosur pranë banesës së deputetit demokrat Xhelal Mziu.

Sipas policisë, ngjarja është shënuar rreth orës 1:00 të mengjesit dhe lënda plasëse është vendosur në murin rrethues të banesës. Për pasojë, ka pasur vetëm dëme materiale.

Nga ana e tij, deputeti i PD është shprehur se nuk ka konflikte me askënd,ndërsa prej 3 ditësh kamerat e sigurisë kanë qenë të fikura.

“Rreth orës 00:55, dyshohet se në rrugën “Arjan Sala”, në murin rrethues të banesës së shtetasit Xh. M., është vendosur një sasi e dyshuar lënde plasëse.

Si pasojë e shpërthimit janë shkaktuar vetëm dëme materiale.

Grupi hetimor po punon për identifikimin dhe kapjen e autorit, si dhe për sqarimin e plotë të rrethanave të ngjarjes”, njofton policia.