Kuvendi i Shqipërisë ka kërkuar nga Komisioni Qendror i Zgjedhjeve (KQZ) dokumentacionin e nevojshëm për verifikimin e mandateve të deputetëve të rinj. Ky proces është kyç për çeljen zyrtare të Legjislaturës së XI të Kuvendit.

Sekretari i Përgjithshëm i Kuvendit, në një shkresë drejtuar KQZ-së, i ka kërkuar këtë dokumentacion në respektim të nenit 69 të Kushtetutës, duke përfshirë të gjithë materialin e depozituar nga kandidatët për deputetë në zgjedhjet e 11 majit 2025.

Presidenti i Republikës, Bajram Begaj, ka dekretuar mbajtjen e mbledhjes së parë të Legjislaturës së XI më datë 12 shtator, në orën 10:00. Presidenti Begaj e ka cilësuar këtë moment si një “faqe të re në jetën institucionale të Republikës së Shqipërisë”.

Në seancën e parë parlamentare, parashikohet të ngrihet komisioni i përkohshëm për verifikimin e mandateve, një hap thelbësor para se deputetët të marrin zyrtarisht detyrën.

Bazuar në rezultatet përfundimtare të zgjedhjeve të 11 majit 2025, shpërndarja e 140 mandateve të Kuvendit të Shqipërisë është si më poshtë:

Partia Socialiste: 83 mandate

Partia Demokratike: 50 mandate

Partia Socialdemokrate: 3 mandate

Partia Mundësia: 2 mandate

Shqipëria Bëhet: 1 mandat

Lëvizja Bashkë: 1 mandat

Nga gjithsej 140 deputetë, 72 prej tyre do të jenë të rinj në Parlament, duke sjellë një përbërje të re në legjislaturën e ardhshme.

Çfarë thotë neni 69 i Kushtetutës?

1. Nuk mund të kandidojnë e as të zgjidhen deputetë, pa hequr dorë nga detyra:

a) gjyqtarët, prokurorët;

b) ushtarakët e shërbimit aktiv;

c) punonjësit e policisë dhe të sigurimit kombëtar;

ç) përfaqësuesit diplomatikë;

d) kryetarët e bashkive dhe të komunave, si dhe prefektët në vendet ku kryejnë

detyrat e tyre;

dh) kryetarët dhe anëtarët e komisioneve të zgjedhjeve;

e) Presidenti i Republikës dhe funksionarët e lartë të administratës shtetërore të

parashikuar nga ligji.

2. Mandati i fituar në kundërshtim me paragrafin 1 të këtij neni është i

pavlefshëm.

/rtsh.al/