Një ngjarje e rëndë është shënuar në orët e para të mëngjesit të sotëm (24 gusht) në autostradën Durrës–Tiranë, në zonën e Sukthit, ku dy persona u përplasën me armë me policinë.

Bëhet e ditur se shërbimet e policisë kanë arrestuar dy persona që vodhën një automjet dhe më pas e përdorën për të kryer një vjedhje me dhunë në një karburant në Sukth.

Automjeti, i vjedhur më 20 gusht në zonën e Sektor Rina në Durrës, u përdor më 21 gusht rreth orës 03:40 për të grabitur paratë e xhiros në karburantin e Sukthit. Policia e Durrësit nisi ndjekjen e automjetit, duke kërkuar ndihmë edhe nga DVP Tiranë.

Gjatë ndjekjes, autorët hapën zjarr ndaj forcave të rendit.

Në shkëmbimin e zjarrit, njëri prej tyre, shtetasi A.D., 28 vjeç nga Bilalasi, Shijak, u plagos dhe u dërgua në Spitalin e Traumës në Tiranë, jashtë rrezikut për jetën.

“Rreth orës 01:00 të mëngjesit të sotëm, në autostradën Durrës-Tiranë, te “Çifligu” në Sukth, shërbimet e Policisë konstatuan automjetin e vjedhur më datë 20.08.2025, në orën 20:30, në Sektor Rinia, Durrës, me të cilin, më datë 21.08.2025, rreth orës 03:40, sipas njoftimit të një shtetasi të punësuar në një karburant në Sukth, ishte grabitur me dhunë shuma e lekëve të xhiros.”- njofton policia.

Shërbimet e Policisë së Durrësit u vunë në ndjekje të automjetit, i cili po lëvizte me shpejtësi në drejtim të Tiranës, dhe u njoftua edhe DVP Tiranë për ndihmë.

Më tej Policia e Shteti njofton, se si pasojë e shpejtësisë së madhe, pa shkuar në Vorë, tek rrethrrotullimi i mbikalimit në rrugën dytësore që shkon për Shijak, automjeti doli nga rruga dhe, gjatë kësaj kohe, nga brenda tij u hap zjarr ndaj punonjësve të Policisë, të cilët, të gjendur përballë kësaj situate, u përgjigjën me zjarr, në kushtet e mbrojtjes së nevojshme. Si pasojë, u plagos njëri nga autorët, shtetasi A. D., 28 vjeç, banues në Bilalas, Shijak, i cili ndodhet në Spitalin e Traumës Tiranë, nën kujdesin e mjekëve, jashtë rrezikut për jetën.

Autori tjetër, L.Ç., 27 vjeç, po nga Bilalasi, u neutralizua dhe arrestua pas rezistencës me armë ndaj policisë.

Në vendin e ngjarjes u sekuestrua një armë kallashnikov me dy krehra fishekësh, e përdorur nga autorët gjatë ngjarjes.

Nën drejtimin e Prokurorisë, vijojnë hetimet nga Sektori për Hetimin e Krimeve ndaj Personit dhe Pasurisë në DVP Durrës për dokumentimin e plotë të ngjarjes./rtsh.al/