Deputeti i Lëvizjes Vetëvendosje, Hekuran Murati, ka akuzuar Gjykatën Kushtetuese për veprim me motive partiake, pas publikimit të vendimit që përcakton se zgjedhja e kryetarit të Kuvendit duhet të bëhet me votim të hapur.

Në një postim në Facebook, Murati tha se vendimet e fundit të Kushtetueses tregojnë një qasje selektive dhe klienteliste, që favorizon “gardën e vjetër” politike.

Ai përmendi edhe vendimin e vitit 2014, kur, sipas tij, kjo gjykatë shërbeu për të mbajtur Partinë Demokratike të Kosovës (PDK) në pushtet, duke mos lejuar formimin e qeverisë pa këtë parti.

“Në vitin 2014, për ta mbajtur PDK-në me çdo kusht në pushtet, Gjykata Kushtetuese ishte bërë vegël e PDK-së dhe kishte vendosur që: 1. Qeveria nuk mund të formohej pa fituesin e zgjedhjeve, pra PDK-në. Nëse nuk ishte PDK-ja në Qeveri, vendi duhej të shkonte në zgjedhje. 2. Pozita e Kryetarit të Kuvendit i takonte fituesit të zgjedhjeve, pra PDK-së, dhe deputetët s’kishin rrugë tjetër pos ta realizonin këtë, qoftë me votim të hapur, të fshehur, apo çfarëdo forme tjetër. Në vitin 2020, Gjykata Kushtetuese bëri kthesë dhe e ndryshoi pikën 1, kur i dha të drejtë Presidentit asokohe që të mandatonte një qeveri pa fituesin brenda, sepse fituesi ishte Lëvizja Vetëvendosje”, tha ai./Arbresh.info

LEXO EDHE:

Vendos Gjykata Kushtetuese: Kuvendi duhet të zgjedhë kreun e ri përmes votimit të hapur