Deputetët e Lidhjes Demokratike të Kosovës (LDK), Besian Mustafa dhe Alban Zogaj, dorëzuan sot në Prokurorinë Speciale të Kosovës vendimin për arkat fiskale.

Mustafa dhe Zogaj dorëzuan vendimin e Gjykatës Supreme, e cila dje publikoi vendimin për shfuqizimin e Udhëzimit Administrativ Nr. 01/2025 për shfrytëzimin e pajisjeve elektronike fiskale, sistemeve fiskale dhe softuerëve elektronikë fiskalë.

Vendim ky që ishte ndërmarr nga ministri i Financave, Hekuran Murati.

Vendimi i Gjykatës është marrë me arsyetimin se ky udhëzim është miratuar nga një qeveri dhe një ministër në detyrë, të cilëve u mungojnë kompetencat për nxjerrjen e akteve nënligjore.

Ky vendim i Supremes nxiti reagime të shumta, ku për këtë reagoi edhe ministri në detyrë i Financave, Hekuran Murati.

Sipas tij, ky vendim nënkupton ndërprerjen e një procesi të rëndësishëm për modernizimin e sistemit tatimor dhe mbetet në favor të një monopoli me kosto të lartë për bizneset./Arbresh.info/