Policisë së Kosovës nga sot i janë shtuar edhe 280 kadetë të rijnë të diplomuar të gjeneratës së 62-të të policisë.

Në këtë ceremoni ishin të pranishëm krerë të lartë të shtetit dhe për të zëvendësuar kryeministrin në detyrë, Albin Kurti, i cili është për vizitë jashtë vendit, ishte zëvendësi i tij, Besnik Bislimi.

Bislimi ka vlerësuar lartë kontributin dhe përkushtimin e Policisë së Kosovës përgjatë 26 viteve të funksionimit të saj, gjatë ceremonisë së diplomimit të gjeneratës së 62-të në Prishtinë.

Ai theksoi se 280 kadetët e sapo diplomuar i bashkon një mision dhe qëllime të përbashkëta, duke i inkurajuar që me profesionalizëm të lartë ta lartësojnë uniformën që mbajnë.

“Për 26 vjet me radhë Policia e Kosovës shërben me dinjitet dhe po forcohet çdo ditë e më shumë. Të jesh pjesë e Policisë së Kosovës është nder dhe krenari e lartë. 280 kadetë i bashkon misioni dhe qëllimet e njëjta. Ju jeni këtu për ta lartësuar uniformën tonë. Kemi investuar në pasje policore kemi rregulluar stacione të policisë. Nga sot nga momenti i betimit ju do ti shërbeni ligjit” , tha Bislimi./Arbresh.info/