Në kuadër të përgatitjeve për organizimin e Zgjedhjeve Lokale për Kryetarë të Komunave dhe për Kuvende Komunale, të cilat do të mbahen më 12 tetor 2025, Komisioni Qendror i Zgjedhjeve, me përkrahjen e Misionit të OSBE-së në Kosovë, ka filluar programin orientues të trajnimit për anëtarët e Komisioneve Komunale të Zgjedhjeve.

Sipas njoftimit nga KQZ, të martën, seanca e parë e trajnimit u zhvillua me rreth 60 anëtarë të Komisioneve Komunale të Zgjedhjeve nga komunat Prishtinë, Podujevë, Vushtrri, Fushë Kosovë, Mitrovicë e Jugut, Mitrovicë e Veriut, Obiliq, Zubin Potok, Zveçan, Leposaviq dhe Graçanicë.

“Zhvillimi i këtij programi, i cili aplikohet në çdo proces zgjedhor, ka për qëllim informimin dhe njoftimin e anëtarëve të Komisioneve Komunale të Zgjedhjeve lidhur me të drejtat dhe detyrimet e tyre ligjore gjatë ushtrimit të mandatit të tyre në Komisionin Qendror të Zgjedhjeve”, thuhet në njoftimin e KQZ-së.

Gjithashtu, zhvillimi i këtij programi trajnues synon arritjen e disa objektivave, disa prej të cilave janë: ofrimi i njohurive për anëtarët e KKZ-ve për ndryshimet në Ligjin për Zgjedhjet e Përgjithshme në vitin 2023 të cilat do të ndikojnë në punën e tyre gjatë mandatit për organizimin e Zgjedhjeve Lokale 2025; Pajisja me njohuri të hollësishme dhe të detajuara lidhur me të drejtat dhe përgjegjësitë në menaxhimin e operacioneve zgjedhore në komunat ku do të veprojnë; Informacione për aktivitetet që lidhen me trajnimin, votimin dhe numërimin në Vendvotime, si dhe për procesin e numërimit në Qendrën Komunale të Numërimit (QKN) dhe Qendrën e Numërimit dhe Rezultateve (QNR), përfshirë përdorimin e platformës digjitale për futjen e të dhënave.

“Gjatë ushtrimit të mandatit të tyre, anëtarët e KKZ-ve gëzojnë një sërë të drejtash dhe kanë përgjegjësi të qarta që lidhen me menaxhimin e operacioneve të ndryshme zgjedhore në komunat përkatëse. Në ditët në vazhdim, programet e trajnimit do të mbahen edhe për anëtarë të tjerë nga Komisionit Komunale të Zgjedhjeve nga komuna të ndryshme të Kosovës”, thuhet tutje në njoftim.

Në muajin qershor, Komisioni Qendror i Zgjedhjeve ka emëruar rreth 220 anëtarë të 38 Komisioneve Komunale të Zgjedhjeve. Sipas Ligjit Nr. 08/L-288 për Zgjedhjet e Përgjithshme, KKZ administron zgjedhjet brenda komunës përkatëse, nën mbikëqyrjen ekskluzive dhe udhëzimet e KQZ-së, duke garantuar ligjshmëri, legjitimitet dhe efikasitet të procesit zgjedhor. Mandati i anëtarëve të KKZ-ve fillon pas emërimit të tyre nga KQZ dhe përfundon 15 ditë pas certifikimit të rezultateve përfundimtare.