Kryeministri i Kosovës, Albin Kurti, ka kritikuar ashpër deputetët e opozitës për mosmbështetjen e konstituimit të Kuvendit të Kosovës, duke i cilësuar ata si “deputetë nomadikë” që nuk duan të kenë “shtëpinë” e tyre, Kuvendin.

Në një deklaratë për mediat, Kurti tha se deputetët e mazhorancës janë ata që dëshirojnë më shumë funksionimin e Kuvendit, pasi ata kanë edhe qeverinë, ndërsa opozita, që nuk ka qeveri, ka vetëm Kuvendin, por nuk e do atë.

Ai theksoi se Kuvendi i Republikës së Kosovës është shtëpia e deputetëve, veçanërisht e atyre opozitarë, dhe i bëri thirrje opozitës të rikthehet në Kuvend.

Kryeministri foli edhe për Qeverinë në detyrë, duke e cilësuar atë si një qeveri tranzicioni, ndërmjet Kurtit 2 dhe Kurtit 3, të cilën e quajti “Qeveria 2.5”.

“Do të shkojmë sërish në Kuvend, por sa më herët që ta kuptojnë që kundërshtimin ndaj meje do të mund ta thonë kur vjen puna te votimi i qeverisë, aq më mirë do të jetë – edhe për ata, edhe për Republikën. Në ndërkohë, Qeveria e Republikës së Kosovës, njëmend i ka kompetencat e kufizuara, por nuk kemi më pak punë. Ne nuk kemi më pak punë – ne kemi më pak kompetenca. Dhe ndërmjet Kurtit 2 dhe Kurtit 3, e kemi këtë qeveri në detyrë, që është qeveri në tranzicion – le ta quajmë Kurti 2.5.”, tha ai./Arbresh.info