Komisionerja për Zgjerim të Bashkimit Evropian, Marta Kos, ka deklaruar të martën në Parlamentin Evropian se Komisioni Evropian është i gatshëm të përgatisë opinionin për aplikimin e Kosovës për anëtarësim në BE, por kjo mund të ndodhë vetëm kur Këshilli i BE-së t’i japë mandatin zyrtar.

“Komisioni Evropian mbetet i gatshëm të përgatisë opinionin për anëtarësimin e Kosovës në BE kur të marrë një kërkesë nga Këshilli i BE-së. Por më lejoni të jem e qartë: rruga e Kosovës drejt BE-së kalon përmes normalizimit të marrëdhënieve me Beogradin, në kuadër të dialogut të ndërmjetësuar nga BE-ja, dhe jo përmes veprimeve të njëanshme”, ka theksuar Kos gjatë një debati në Komisionin për Politikë të Jashtme në Parlamentin Evropian.

Ajo u ka bërë thirrje autoriteteve në Prishtinë që të formojnë sa më shpejt institucionet e reja dhe të përqendrohen në reforma thelbësore.

“Në Kosovë, pas zgjedhjeve, është thelbësore të formohen shpejt institucionet dhe të ecet përpara me reformat kyçe në sistemin e drejtësisë, në media dhe në administratën publike. Një qeveri funksionale dhe një kuvend aktiv janë të domosdoshëm që Kosova të përfitojë nga plani i BE-së për reforma dhe zhvillim për gjashtë vendet e Ballkanit Perëndimor”, ka deklaruar mes tjerash Kos.

Kosova ka më shumë se dy vjet që ka dorëzuar kërkesën për anëtarësim në BE, por Këshilli i BE-së ende nuk e ka shqyrtuar aplikimin.