Dhomat e Specializuara të Kosovës (DHSK) kanë shprehur keqardhjen për anulimin e detyruar të konferencës për shtyp të kryetares së Speciales, Ekaterina Trendafilova të planifikuar për sot në Prishtinë.

Anulimi i konferencës së Trenfafilovas është bërë pas protestave të veteranëve të cilët kanë kundërshtuar vizitën e saj në Kosovë, përcjell Arbresh.info.

LEXO EDHE:

“Poshtë Specialja”, hidhet tym i zi në protestën e veteranëve kundër Trendafilovës

“Duke mbajtur parasysh se gjykimet mbahen jashtë Kosovës, Dhomat e Specializuara të Kosovës dhe Kryetarja e Dhomave të Specializuara të Kosovës kanë synim të mbajnë vazhdimisht të informuar publikun në Kosovë lidhur me proceset gjyqësore në Hagë, për informacion të përditësuar, objektiv dhe transparent. Ky ishte qëllimi i vizitës së Kryetare Trendafilovës në Kosovë këtë javë dhe gjithashtu i takimeve me gazetarët në Kosovë si takimi që ishte planifikuar sot, ku mediat mund të bëjnë pyetje dhe dëgjojnë përgjigje nga gjykata”, thuhet në reagimin e DHSK-së.

“Nuk ishte e mundur që veprimtaria të mbahej sot për shkak të protestave të veteranëve dhe të tjerëve ku u hodhën bomba tymuese që u bënë për të penguar mbajtjen e takimit. Duke njohur të drejtën demokratike për protestë paqësore, DHSK-ja shpreh keqardhjen që në situatën e sotme gazetarët u penguan që t’i bënin pyetje vetë Kryetares së Gjykatës”, thuhet më tej në reagim.
DHSK-ja në fund thekson se mbetet e angazhuar për informimin në mënyrë transparente të publikut dhe gazetarëve në Kosovë në lidhje me ecurinë e procese gjyqësore në Hagë dhe do të vazhdojë ta bëjë këtë./Arbresh.info