Kryesia e LDK-së, nënkryetari, Anton Quni me bashkëpunëtorë bënë homazhe dhe nderuan jetën e veprën e ish-kryetarit të Klinës dhe veprimtarit të orëve të para të LDK-së, Ismet Rraci, në 24 vjetorin e vrasjes së tij.

LDK, në një postim në Facebook, përkujtojnë veprimtarin Rraci, vlerësojnë se Kosova dhe populli i saj humbi një njeri me shumë virtyte dhe një njeri që rrallë mund të përsëritet

“Ismet Rraci, u nda padrejtësisht nga jeta në prillin e vitit 2001, ishte një intelektual i rrallë, besnik, guximtar, veprimtar i devotshëm i cili në kohëra të vështira dha shumë për Kosovën. Ai ishte personalitet përbashkues, patriot i madh, intelektual i shquar, burrë i ndershëm, punëtor i pandalshëm si para, gjatë dhe pas luftës së fundit, si dhe mik e bashkëpunëtor i afërt i Presidentit Ibrahim Rugova”, thuhet në njoftimin për media.

LDK thotë se Rraci përherë do të kujtohet për kontributin e tij të jashtëzakonshëm në të mirë të atdheut.