Ministri i Shëndetësisë së Maqedonisë së Veriut Arben Taravari, deklaroi sot se trajtimi i pacientëve nga zjarri i Koçanit në vendet tjera përgjithësisht është pa pagesë.

“Përgjithësisht, 99 për qind e trajtimit është falas dhe nuk ka nevojë që askush të mbledhë para. Pra, nuk ka nevojë për spekulime dhe të pavërteta. Kjo është e vërteta që u publikua tre-katër ditë më parë, nuk është tani. Ndoshta në disa vende, por përgjithësisht 99 për qind e trajtimit në të gjitha vendet është falas”, tha Taravari.

Ai shtoi se Qeveria ka siguruar mjete për udhëtim dhe akomodim për dy prindër apo familjarë të pacientëve në të gjitha vendet.

Ai informoi se pas mbledhjes së rregullt të shtabit të krizës në Ministrinë e Shëndetësisë se numri i pacientëve që trajtohen aktualisht është 162 dhe sot 10 prej pacientëve që janë të shtruar në spital do të lirohen nga spitali.

Në tragjedinë e ndodhur më 16 mars në diskotekën “Pulse” në Koçan kanë humbur jetën 59 persona dhe mbi 150 janë lënduar, raporton Alsat-M.