Pas nisjes së stinorit në mënyrën që ata nuk e pritën, Llapi ka marrë një vendim të rëndësishëm pas përfundimit të kampionatit vjeshtor në Superligë.

Llapjanët kanë ndarë rrugët me ndihmëstrajnerin Burim Shala, trajnerin kondicional Arsim Tërshani dhe trajnerin e portierëve Diamant Kadriolli, shkruan Arbresh.info.

Lajmin e ka bërë të ditur vetë skuadra nga Podujeva përmes një postimi në rrjetin social Facebook.

Në njoftim thuhet se skuadra dhe stafi i trajnerëve me marrëveshje të dyanshme kanë ndarë rrugët.

“KF Llapi njofton se, me marrëveshje të dyanshme dhe në dakordësi mes klubit dhe trajnerëve, është vendosur të mbyllet bashkëpunimi me ndihmëstrajnerin Burim Shala, trajnerin kondicional Arsim Tërshani dhe trajnerin e portierëve Diamant Kadriolli. Ky vendim është marrë pas analizës së bërë mes drejtuesve të klubit dhe stafit të trajnerëve dhe nuk ka të bëj në asnjë aspekt me shkarkim”, shkruhet në njoftimit e nënkampionit të Kosovës, ndër të tjera.

Llapi nuk e ka nisur fare mirë këtë sezon dhe pas 18 xhirove ndodhet në pozitën e nëntë që të dërgon në Ligën e Parë me vetëm 18 pikë të grumbulluara deri më tani./Arbresh.info