Presidentja e vendit, Vjosa Osmani, ka shprehur dhimbje të thellë për vdekjen e profesor Sami Repishtit, patriotit të madh, zërit të shquar për drejtësi, liri e pavarësi të Kosovës.

Në një postim në Facebook, zyra e Presidencës njofton se  Osmani ka pranuar me dhimbje të thellë lajmin për ndarjen nga jeta të profesor Sami Repishtit, patriotit të madh, zërit të shquar për drejtësi, liri e pavarësi të Kosovës, shkruan Arbresh.info.

“Vepra e profesor Sami Repishtit është dëshmi e guximit dhe e përkushtimit – duke qëndruar në ballë të luftës për të drejtat e njeriut dhe luftës për lirinë dhe pavarësinë e Kosovës. Dëshmia e tij në institucionet amerikane, shkrimet e tij për historinë e Kosovës dhe dashuria e tij e thellë për popullin tonë do të mbeten të paharrueshme. Ai ishte një patriot e prijetar me vizion, përpjekjet e të cilit ndihmuan në formësimin e rrugës drejt pavarësisë sonë”, thuhet në njoftim.

Duke shprehur mirënjohjen për përkushtimin e profesor Repishtit për çështjen shqiptare, presidentja Osmani tha se trashëgimia e tij do të jetojë për sa të jetë kombi ynë./Arbresh.info/