Kandidati për kryeministër nga Partia Demokratike e Kosovë, Bedri Hamza së bashku me përfaqësuesit e “Qatar Charity” kanë qëndruar sot në fshatin Frashër në Mitrovicë.

Ata kanë parë nga afër kompleksin social të ndërtuar bashkarisht, i cili ka 40 shtëpi për familjet mitrovicase, shkollë moderne, Qendër të Mjekësisë Familjare dhe objekte të tjera përcjellëse, transmeton Arbresh.info.

Me anë të një postimi në Facebook, Hamza ka thënë se gjatë qeverisjes së tij, krahas rritjes për 50 për qind të asistencës sociale, do të sigurohet që me një program të veçantë të ndihmojë përfituesit e këtyre skemave që të integrohen edhe në tregun e punës.

“Në qeverinë time, asistenca për familjet që janë pjesë e skemave sociale do të rritet për 50 për qind. Me program të veçantë, me trajnime dhe subvencione të punësimit, ne do t’i inkurajojmë dhe mbështetesim përfituesit e skemave sociale që të integrohen në tregun e punës”, ka thënë ai.

Pas vizitës në Frashër, Hamza ka marrë pjesë në përurimin e Qendrës së re të Mjekësisë Familjare në Iliridë./Arbresh.info