Oda Ekonomike Gjermano-Kosovare, në bashkëpunim me Komitetin Lindor të Ekonomisë Gjermane (Ost-Ausschuss der deutschen Wirtschaft) sot mban Forumin e Dytë Ekonomik Gjermano-Kosovar.

Sipas njoftimit, ky forum do të mbahet më 2-3 Tetor, shkruan Arbresh.info.

Ky forum do të ketë mbi 500 pjesëmarrës.

“Ky forum do të shërbejë si një platformë e veçantë ku liderët e politikës dhe biznesit nga Gjermania dhe Kosova do të diskutojnë sfidat gjeopolitike dhe mundësitë e reja ekonomike. Forumi do të hapet nga Zëvendëskryeministri i Kosovës, z. Besnik Bislimi, dhe Ambasadori Gjerman, z. Jörn Rohde. Të pranishëm do të jenë gjithashtu z. Manuel Sarrazin, I Dërguari i Posaçëm i Gjermanisë për Ballkanin Perëndimor, dhe deputeti i Bundestag, z. Peter Beyer.”, thuhet në njoftim.

“Forumi do të mirëpresë përfaqësues të njohur nga kompanitë gjermane dhe jo vetëm. Panele të nivelit të lartë, përfshirë përfaqësues nga Ministria Federale për Çështje Ekonomike dhe Veprim Klimatik (BMWK) dhe liderë të kompanive gjermane, do të diskutojnë zgjidhjet për energjinë, teknologjinë dhe industrinë.”, thuhet tutje.

Në njoftimin për media thuhet se Forumi Ekonomik Gjermano-Kosovar i vitit 2022 i solli Kosovës një investim prej 20 milionë euro në sektorin e prodhimit.

“Forumi i këtij viti synon të forcojë lidhjet ekonomike mes dy vendeve dhe të krijojë mundësi të reja bashkëpunimi.”, thuhet tutje/Arbresh.info/