Sot, Besnik Boletini ka dorëhequr nga pozita e kryetarit dhe anëtarit të Bordit të RTK-së.

Pas kësaj, Arta Berisha, një tjetër anëtare e Bordit të RTK-së, ka njoftuar gjithashtu për dorëheqjen e saj.

Berisha e shpalli vendimin e saj duke theksuar se raporti i Komisionit të RTK-së është i qartë dhe tregon se botimi i një teksti të paverifikuar – fillimisht nga një medium tjetër – ka shkelur standardet profesionale të gazetarisë. Ajo theksoi se bordi është gënjyer në këtë rast.

Këto dorëheqje janë bërë pas kritikave të shumta për publikimin e një lajmi nga RTK-ja pa përmbushur standardet e kërkuara për verifikim. Lajmi, i marrë nga “Slobodna Bosna”, pretendonte se dy portalet, Nacionale dhe Periskopi, janë të financuara nga Serbia.

Postimi i plotë i saj:

“Sot, pas mbledhjes së Bordit të Radio Televizionit të Kosovës (RTK), kam dhënë dorëheqje nga funksioni i anëtares së Bordit të RTK-së.

Për mua ka qenë përgjegjësi e madhe dhe nder të jap kontributin tim profesional në përpjekjen që transmetuesin publik ta avancojmë drejt një shtëpie informative në shërbim të së vërtetës, edukimit dhe emancipimit shoqëror

Falënderoj Kuvendin e Republikës së Kosovës për besimin e dhënë për të qenë pjesë e autoritetit më të lartë drejtues të RTK-së.

Duke qenë mbështetëse e standardeve profesionale në gazetari, të cilat i kam respektuar maksimalisht qoftë si gazetare aktive, qoftë si anëtare e Bordit të RTK-së, për mua ka qenë e paparanueshme që shkelësit e standardeve profesionale të kalojnë pa u ndëshkuar sipas rregulloreve të RTK-së.

Raporti i Komisionit të RTK-së është i qartë dhe tregon se në rastin e fundit – botimin e një teksti të paverifikuar dhe të plasuar fillimisht nga një medium tjetër – janë shkelur standardet profesionale të gazetarisë, për më keq: bordi është gënjyer. Kjo për mua është e patolerueshme. Shpresoj se praktika e mosndëshkimit të mos rikthehet në RTK”.