Djali i presidentit amerikan Joe Biden, Hunter Biden, nuk do të dëshmojë në gjyqin penal për akuzat se ai nuk ka deklaruar se ishte përdorues droge në formularin për blerjen e një arme në vitin 2018, tha avokati i tij.

CNN-i njofton se Abbe Lowell, avokati i Hunter Biden, tha në gjykatë të hënën se klienti i tij nuk do të dëshmojë, duke nxitur gjykatësin të udhëzojë anëtarët e jurisë se ata nuk duhet ta përdorin këtë fakt kundër Biden, shkruan VOA.

Prokurorët në gjyqin e parë penal ndaj të birit të një presidenti amerikan përfunduan të premten paraqitjen e provave dhe dëshmitarëve, pas një jave, në të cilin u zbuluan hollësi intime të viteve të abuzimit me alkoolin dhe kokainën, gjë që prokurorët thonë se e bënin të paligjshme blerjen e armëve për Biden.

Hunter Biden, 54 vjeç, ka thënë se është deklaruar i pafajshëm për akuzat penale se ka gënjyer mbi varësinë nga droga në formularin qeveritar për blerjen e një pistolete “Colt Cobra” dhe posedim të paligjshëm të armës për 11 ditë.

Mbrojtja tha se të hënën Hunter Biden nuk do të dëshmonte në gjyqin e tij. Dëshmia mund të jetë e rrezikshme për të pandehurit sepse ata përballen me pyetjet e prokurorëve.

Gjyqi, që po zhvillohet në një gjykatë federale në Delauer, pason gjyqin historik ndaj ish Presidentit Donald Trump, në të cilin më 30 maj ai u shpall fajtor për 34 akuza penale. Trump pritet të jetë kandidat republikanëve për president në zgjedhjet presidenciale të 5 nëntorit, në të cilat pritet të ndeshet me Presidentin Biden.

Trump dhe disa nga aleatët e tij republikanë në Kongres kanë pretenduar se gjyqi në Nju Jork dhe tre çështjet e tjera penale ndaj tij janë përpjekje të motivuara politikisht për ta penguar kthimin e tij në pushtet.

Ligjvënësit demokratë në Kongres citojnë hetimin dhe gjyqin ndaj Hunter Bidenit si provë se Presidenti Joe Biden nuk po përdor sistemin e drejtësisë për qëllime politike apo personale.

Javën e kaluar, ish-bashkëshortja, ish e dashura dhe kunata e Hunter Biden dëshmuan për historinë e përdorimit të drogës prej tij, duke u thënë anëtarëve të jurisë se ato shpesh gjenin drogë në banesën e tij dhe ishin të shqetësuar për varësinë e tij nga droga.

Hunter Biden i tha gjykatësit që mbikëqyrte çështjen në një seancë dëgjimore të vitit 2023 se ai nuk ka konsumuar alkool ose drogë që nga viti 2019.

Avokati i Biden, Abbe Lowell, u tha anëtarëve të jurisë gjatë deklaratës së tij hapëse se klienti i tij nuk kishte ndërmend të mashtronte sepse në kohën kur bleu armën ai nuk e konsideronte veten përdorues droge.

Mbrojtja thirri tre dëshmitarë të premten, përfshirë pronarin e dyqanit të armëve dhe një punonjëse dhe vajzën e Biden, Naomi, e cila tha se babai i saj dukej se ishte mirë kur ajo e pa atë gjatë javëve para dhe pasi blerjes së armës.

Nëse shpallet fajtor, Hunter Biden përballet me një dënim prej 25 vitesh burg, ndonëse për kundërvajtjet për herë të parë shkelësit e ligjit marrin dënime shumë më të ulëta se sa parashikon dënimi maksimal. Mbetet e paqartë nëse gjykatësi do t’i japë atij dënim me burg.