Kryetari i Kuvendit të Kosovës, Glauk Konjufca ka uruar të gjithë qytetarët ortodoks me rastin e Pashkëve.

Me anë të një postimi në Facebook, Konjufca ka thënë që kjo festë le ta gjejë gjithkënd përreth vlerave të solidaritetit dhe mirësisë, përcjell Arbresh.info.

“Gëzuar Pashkën ortodokse të gjithë bashkëqytetarëve të besimit ortodoks! Kjo festë që vjen në frymën e ripërtëritjes dhe rikthimit të shpresës, që kërkon reflektimin për rëndësinë dhe domethënien e sakrificës, që kërkon të forcojë vlerësimin, respektin dhe përkujdesin ndaj njëri-tjetrit, le ta gjejë gjithkënd përreth vlerave të solidaritetit dhe mirësisë”, ka shkruar Konjufca.

“Ajo na tregon për efektin e madh ndriçues mbi errësirën, tregon se e mira triumfon edhe kur mund të duket e pafuqishme, se drejtësia nuk është vetëm çështje force, por më së pari, çështje besimi dhe insistimi tek ajo. Këto mësime të vyera i shërbejnë përnaltësimit të jetës shpirtërore, teksa pasqyrohen në jetën shoqërore. Mbarësi, gëzim, shëndet e harmoni në familjet tuaja, sot e gjithmonë!”, tha Konjufca./Arbresh.info