Partia Socialdemokrate ka kërkuar lirimin e kryetarit Dardan Molliqaj dhe pesë aktivistëve të kësaj partie të arrestuar dje gjatë protestës së PSD-së në kundërshtim të vizitës së kryetares së Dhomave të Specializuara të Gjykatës Speciale, Ekaterina Trendafilova.

Anëtar i Kryesisë së PSD-së, Dren Kukaj, ka prezantuar me fotografi për siç tha dhunën e përdorur nga Policia e Kosovës gjatë protestës. Sipas tij, në arrestimin e aktivistëve përveç policëve është përfshirë edhe një person i sigurimit privat të hotelit ku ka qëndruar Trendafilova.

Kukaj theksoi se nuk janë përdorur armë nga aktivistët, por nga Policia e Kosovës. Ai kërkoi prej Prokurorisë dhe Policisë që të merren për bazë faktet dhe të zbardhet e vërteta.

“Këto pak informacione që e kemi është e qarta se mos-lirimi i tyre është i jashtëligjshëm. Të drejtën që e kanë për protesta ata sot janë në burg. Tjetër skandal është që të përfshirë në arrestimin e këtyre personave përveç Policëve është një person i sigurimit privat të Hotelit Sirius që i ka ndihmuar arrestimin e aktivistëve tanë. Policia nuk është dashtë më lejuar këtë. Me prej këtu i kërkojmë edhe Prokurorisë edhe Policisë të shikojnë faktet dhe t’i kuptojmë të drejtat që na takojnë neve dhe sa më parë të lirohen aktivistët tonë”, theksoi Kukaj./rtk