Kryeministri i Kosovës, Albin Kurti  tha se nëntori historikisht ka shënuar ngjarjet më të rëndësishme të popullit tonë.

Ndër to ai, përmendi edhe “Ditën e Forcës” duke e quajtur “vazhdimësi e Ushtrisë Çlirimtare të Kosovës,  shkruan Arbresh.info.

“Historikisht nëntori ka shënuar ngjarjet më të rëndësishme të popullit tonë. Fitoren e Skënderbeut në Krujë, ngritjen e flamurit në Vlorë, ditëlindjen e Kryekomandantit Adem Jashari dhe daljen e parë publike të UÇK-së. Festës së 28 Nëntorit të këtyre ngjarjeve po i paraprijmë me Ditën e Forcës, ushtrisë sonë që është vazhdimësi e Ushtrisë Çlirimtare të Kosovës, mishërim i trimërisë së Adem Jasharit, idealit të Adem Demaçit, dëshirës, vullnetit e ëndrrës së kamotshme të popullit tonë.”, shkroi ai.

Tutje kryeministri Kurti tha se për këto 32 muaj qeverisje buxheti i Ministrisë së Mbrojtjes është rritur dyfish ndërsa investimet në armatim për gati trefish.

Sipas tij, FSK-së u janë shtuar 1852 ushtarë të rinj, duke premtuar edhe shtimin e 600 rekurëtëve të tjerë në vitin e ardhshëm.

Ndër të tjera, ai përmendi edhe trajnimin dh shkollimin e 2459 ushtarakëve të tjerë jashtë vendit.

“Për këto 32 muaj qeverisje, çdo ditë ka qenë dita e ushtrisë. Buxhetin për Ministrinë e Mbrojtjes e kemi rritur për më shumë se dyfish, investimet në armatimi për gati trefish, Forcës së Sigurisë ia kemi shtuar 1852 ushtarë të rinj e në vitin e ardhshëm do t’ia shtojmë edhe 600 rekrutë tjerë, kurse 3459 ushtarakë u trajtuan e shkolluan jashtë vendit.”, tha ai.

“Ushtrinë do ta mbështesim pa u kursyer sepse ajo është shtyllë e jona mbështetëse që nuk kursen.”, u shpreh ai./Arbresh.info/