Sot, shënohet Dita Ndërkombëtare për t’i dhënë fund mosndëshkimit të krimeve kundër gazetarëve.

Këtë ditë, Asociacioni i Gazetarëve të Kosovës (AGK) do e shënojë me disa aktivitete në bashkëpunim me organizatat partnere vendore dhe ndërkombëtare, shkruan Arbresh.info.

Aktivitetet në rrjetet sociale:

Kampanja I – është realizuar nga AGK-ja, dhe me fillim nga ora 09:00 do të shpërndahen mesazhe e thirrje nga ambasadorë, partnerë, gazetarë e ekspertë të medias, për rëndësinë e ndëshkimit të kërcënimeve e sulmeve kundër gazetarëve.

Kampanja II – është produkt i Platformës Rajonale të Ballkanit Perëndimor, Safe Journalists, pjesë e së cilës është edhe AGK-ja.

Kampanja ka moton “Mos hezitoni të raportoni”, mesazh ky drejtuar kolegëve gazetarë, kameramanë e fotoreporterë që t’i raportojnë rastet e kërcënimeve e sulmeve në organet e sigurisë.

Pjesë e kësaj kampanje nga Kosova, është Majori, Baki Kelani – Shef i Departamentit të Komunikimit me Publikun në Policinë e Kosovës, dhe Bashkim Zeqaj – Prokuror i Shtetit.

Aktiviteti në bashkëpunim me British Embassy Pristina

Në Kino Armata, do të shfaqet dokumentari për jetën, profesionin dhe vrasjen e gazetares Lyra McKee.

“Lyra”, do të shfaqet me fillim nga ora 17:00 dhe hyrja është pa pagesë.

Sipas të dhënave të AGK-së, që nga janari e deri në fund të muajit tetor të këtij viti, janë raportuar 63 raste të sulmeve dhe të kërcënimeve kundër gazetarëve e mediave./Arbresh.info/