Në kuadër të Samitit të Procesit të Berlinit, ka mbërritur në Rinas Presidentja e Komisionit Europian, Ursula von der Leyen. Ajo është pritur në aeroport nga ministrja për Marrëdhëniet me Parlamentin e Shqipërisë, Elisa Spiropali.

Përmes një postimi në rrjetin social “Facebook”, ministrja Spiropali shkruan se “ky samit është një tjetër event i rëndësishëm ndërkombëtar për Shqipërinë, i cili zhvillohet për herë të parë jashtë kufijve të BE-së, me pjesëmarrjen e 6 kryeministrave të rajonit, liderëve të vendeve anëtare të BE-së si dhe përfaqësuesve të nivelit të lartë dhe organizmave ndërkombëtare të mbi 25 vendeve”.

Pas mbërritjes në kryeqytetin e Shqipërisë, Von der Leyen ka zhvilluar takim me Presidentin e Shqipërisë Bajram Begaj, në orën 15:30 në Presidencë.

Më tej, Von der Leyen do të takohet me kryeministrin e Shqipërisë Edi Rama, me të cilin pritet të zhvillojnë një konferencë për media rreth orës 17:30.

Sjellim në vëmendje se këtë të hënë do të mbahet në Tiranë Samiti i Procesit të Berlinit, ku do të marrin pjesë të gjithë liderët e vendeve të Ballkanit, të shteteve anëtare të Bashkimit Europian dhe përfaqësuesit më të lartë të BE-së.

Ky lloj samiti i një rëndësie të veçantë mbahet për herë të parë jashtë kufijve të BE-së./tvklan.al