Shefi i Grupit Parlamentarë të AAK-së, Besnik Tahiri ka uruar Policinë e Kosovës në 24 vjetorin e themelimit të saj.

Tahiri ka thënë se Policia është krenaria e Kosovës duke theksuar se ata duhet të marrin pagën e dinjitetshme, përcjell Arbresh.info.

Përmes një postimi në rrjetin social Facebook, Tahiri shtoi se në këtë përvjetor, policët është dashur të merrnin lajmin e shumëpritur për shtesat e tyre.

“Megjithatë, në vend të defilimit të zyrtarëve të Qeverisë në shesh dhe fotografimit me policë, sot Policët e Kosovës kanë pasur nevojë që të marrin lajmin e shumëpritur për shtesat e tyre: Për pagesën e orëve shtesë; për pagesën e rrezikshmërisë; për rritjen e koeficientit të pagave; për Ligjin për Sigurimet Shëndetësore; për Ligjin për Sigurimin Jetësor”, ka shkruar Tahiri.

Postimi i plotë:

Fjalë shumë e mbështetje pak për Policinë e Kosovës

Policia e Kosovës është krenaria e Kosovës – me këtë fjali do të doja të uroj 24 vjetorin secilit polic, i cili është pjesë e këtij institucioni të sigurisë.

Megjithatë, në vend të defilimit të zyrtarëve të Qeverisë në shesh dhe fotografimit me policë, sot Policët e Kosovës kanë pasur nevojë që të marrin lajmin e shumëpritur për shtesat e tyre: Për pagesën e orëve shtesë; për pagesën e rrezikshmërisë; për rritjen e koeficientit të pagave; për Ligjin për Sigurimet Shëndetësore; për Ligjin për Sigurimin Jetësor.

Këto janë brengat e secilit polic.

Policëve nuk u intereson se në çfarë forme trajtohet paga e tyre. Atyre u intereson që ta marrin pagën e dinjitetshme. Po bëhen tri vjet që po jepen shumë fjalë për Policinë e Kosovës, por mbështetje shumë pak./Arbresh.info/