Inspektorati Policor i Kosovës, respektivisht Departamenti i Inspektimit ka njoftuar se ka publikuar raportin e inspektimit lidhur me “Vlerësimin e performancës së Stacionit Policor të Ferizajt”.

Siç thuhet në njoftim, inspektimi është realizuar me kërkesë të Kryeshefit Ekzekutiv të IPK-së dhe është përqendruar në Stacionin Policor të Ferizajt, në kuadër të Drejtorisë Rajonale Policore të Ferizajt.

“Inspektimi ka qenë me interes për IPK-në, me qëllim që të vlerësohet nëse Stacioni është duke realizuar me sukses objektivat në përmbushje të mandatit ligjor. Gjithashtu, inspektimi ka ofruar mundësi për t’u njohur edhe me performancën e këtij Stacioni”, thuhet në njoftim.

Gjetjet e këtij inspektimi janë me interes për strukturën përkatëse policore, përfshirë nivelin drejtues dhe atë operativ – administrativ.

“IPK në kuadër të Raportit të inspektimit ka dhënë 12 rekomandime, që kanë të bëjnë me sistemimin dhe shpërndarjen e burimeve njerëzore, furnizimin me sprej, përfshirjen e personelit në disa prej programeve specifike trajnuese, ngritjen e shkallës së realizimit të urdhëresave, vlerësimin e faktorëve që kanë ndikuar në ngritjen e numrit të të arrestuarve, regjistrimin në bazën e të dhënave të rasteve me pro– forma, respektimin e zinxhirit komandues gjatë procedimit të kallëzimeve penale në Prokurorinë e Shtetit, përmirësimin e shërbimeve logjistike dhe kushteve të punës, etj”, njofton tutje IKP.

Lidhur me rezultatin e inspektimit duke përfshirë edhe rekomandimet e dhëna, të gjithë të interesuarit mund të kenë qasje në Raportin e plotë të inspektimit, i cili është i publikuar në faqen zyrtare të IPK-së, kliko KËTU. /Arbresh.info