Katër turistë, një austriak dhe tre kosovare që rrezikonin të mbyteshin sot në Shëngjin, u shpëtuan nga Policia Kufitare dhë Njësia Policore Detare.

Sipas Policisë shqiptare, ata u njoftuan se një shtetas austriak, duke ushtruar sërf, në hapësirën detare të plazhit “Vain”, ishte spostuar në thellësi nga era dhe kërkonte ndihmë pasi rrezikonte të mbytej për shkak të erës së fortë, përcjell Arbresh.info.

Ndërkaq, tre kosovaret, sipas njoftimit, duke lundruar me pedalon, i kishte shtyrë era në thellësi dhe për shkak të erës dhe dallgëve rezikonin të mbyteshin.

”Shërbimet e Policisë Kufitare janë nisur menjëherë, me mjetet lundruese, në drejtim të dy adresave ku kërkohej ndihmë dhe pas ndërhyrjes kanë bërë të mundur marrjen në bord të shtetasit austriak, ndërsa patrulla tjetër e Policisë Kufitare bëri të mundur gjetjen dhe nxjerrjen në breg të detit në gjendje të mirë shëndetësore, të tre shtetaseve kosovare. Turisti austriak dhe tre shtetaset kosovare, kanë falënderuar Policinë Kufitare për reagimin në kohë duke u shpëtuar jetën.”, thuhet në njoftimin e Policisë shqiptare./Arbresh.info