Kryeministri i Shqipërisë, Edi Rama, ka thënë se vendosja e policisë për të mbrojtur ndërtesat boshe të komunave në veri, në të cilat nuk mund të hyjnë kryetarët e rinj dhe vendosja e trupave të ushtrisë serbe pranë kufirit me Kosovën, janë veprime vetënxitëse dhe aspak evropiane.

Derisa ka publikuar deklaratën e Shefit të diplomacisë së Bashkimit Evropian, Josep Borrell, i cili u bëri thirrje palëve që sa më parë ta depërshkallëzojnë situatën, Rama ka thënë se BE-ja nuk mund të jetë më e qartë se kaq.

Rama ka shtuar se Kosova dhe Serbia duhet të gjejnë zgjidhje për këto tensione para se BE-ja të zbatojë masa të forta kundër të dyjave.

“Shpresoj shumë që Kosova jonë vëllazërore dhe Serbia mike do ta zgjidhin këtë konflikt përpara se BE-ja të zbatojë masa të forta kundër tyre. Ata duhet të veprojnë shpejt dhe të kuptojnë se përmbushja e kërkesave të BE-së do të thotë kthim në vete si shtete evropiane përgjegjëse”, ka shkruar ai në Twitter.

Bashkimi Evropian ka reaguar edhe një herë pas tensioneve në javën e fundit në veriun e Kosovës.

Përmes një njoftimi zyrtar, BE ka kërkuar që situata të shtensionohet dhe kryetarët e zgjedhur të katër komunave në veri punën ta bëjnë në objekte alternative, e jo në ato komunale.

BE ka kërkuar nga Kosova që të tërheq forcat e rendit të cilat janë afër objekteve komunale ndërsa ka shprehur shqetësim edhe për ngritjen e gatishmërisë së ushtrisë serbe.