Misioni i NATO-s në Kosovë, KFOR, ka njoftuar se po punon për zbutjen e situatës në veri të Kosovës dhe është në kontakt me shumë institucione nga Kosova dhe Serbia.

Në një komunikatë drejtuar medieve, KFOR-i ka njoftuar se nuk janë takuar me kryetarin e Listës Serbe, Goran Rakiq, dhe se raportimet për paralajmërimin e komandantit të KFOR-it se do të shtijë me armë në Zveçan, janë të pavërteta.

“Komandanti i KFOR-it dhe stafi i tij po punojnë për zbutjen e situatës dhe janë në kontakt me të gjitha palët, duke përfshirë përfaqësuesit e institucioneve dhe të organizatave të sigurisë në Kosovë dhe me Forcat e Armatosura të Serbisë. Raportimet e mediave për një takim me Goran Rakiqin janë të pabaza, po ashtu edhe pretendimet se komandanti i KFOR-it ka bërë ndonjë paralajmërim për të shtëna në Zveçan”, thuhet në komunikatë.

Situata në veriun e vendit është e tensionuar nga mëngjesi i sotëm, ku kordoni i protestuesve serbë ka tentuar të hyjë në objektet komunale në Zveçan, Leposaviq dhe Zubin Potok.

Atje është parë prezencë e shtuar e njësiteve të Policisë së Kosovës dhe njësitë ushtarake profesionale të KFOR-it./Arbresh.info