Kina ka raportuar rastin e parë fatal të gripit të shpendëve H3N8 te njerëzit, pasi regjistroi dy infeksione të tjera jo-fatale me këtë sëmundje vitin e kaluar, njoftoi Organizata Botërore e Shëndetësisë (OBSH).

Vdekja e raportuar ishte ajo e një gruaje 56-vjeçare nga provinca jugore kineze e Guangdong.

OBSH tha se një përhapje më e gjerë e virusit midis njerëzve ishte e pamundur, por megjithatë theksoi rëndësinë e “mbikqyrjes globale për të zbuluar ndryshimet virologjike, epidemiologjike dhe klinike të lidhura me viruset qarkulluese të gripit që mund të ndikojnë në shëndetin e njerëzve ose kafshëve”.

Gruaja që vdiq kishte një sërë sëmundjesh themelore dhe shpesh ishte e ekspozuar ndaj shpendëve të gjallë dhe shpendëve të egër, tha OBSH.

Ajo u sëmur më 22 shkurt, u shtrua në spital me pneumoni të rëndë më 3 mars dhe vdiq më 16 mars.

Raporti tha se burimi i infeksionit mund të ketë qenë një treg i lagësht i vizituar nga gruaja përpara se të sëmurej, pasi mostrat e mbledhura atje kishin rezultuar pozitive për gripin A(H3).

Asnjë rast i infeksionit nuk ishte gjetur tek askush që kishte qenë në kontakt të ngushtë me gruan, tha OBSH.

“Bazuar në informacionin e disponueshëm, duket se ky virus nuk ka aftësinë të përhapet lehtësisht nga personi në person dhe për këtë arsye rreziku i përhapjes së tij midis njerëzve në nivel kombëtar, rajonal dhe ndërkombëtar konsiderohet i ulët”, thuhet në deklaratë.

Virusi H3N8 zbulohet zakonisht te zogjtë, por shkakton pak simptoma. Virusi dihet se ka qarkulluar që nga viti 2002 kur u gjet për herë të parë te shpendët e ujit të Amerikës së Veriut, raporton DW.

Rastet e para të regjistruara njerëzore janë ato që janë shfaqur tani në Kinë. Dy rastet e mëparshme u raportuan prillin dhe majin e kaluar, me një person që u sëmur rëndë, ndërsa tjetri kishte vetëm simptoma të lehta.