Prokuroria themelore në Prishtinë ka filluar hetimet për sulmin e mbrëmshëm ndaj gazetarit Valon Syla.

Në një njoftim për media, nga kjo prokurori bëjnë të ditur se pas rastit, kanë dalë në vendngjarje dhe kanë filluar hetimet, të cilat sipas tyre, po zhvillohen në mënyrë intensive në mënyrë që të sqarohen gjitha rrethanat dhe të identifikohen të dyshuarit.

Rasti është cilësuar si “Lëndim i lehtë trupor”.

“Prokuroria Themelore në Prishtinë ju njofton lidhur me rastin e gazetarit V.S., i cili ka marrë lëndime trupore si pasojë e sulmit fizik nga tre persona, me ç’ rast i njëjti ka pranuar trajtimin e nevojshëm mjekësor, derisa Prokurori i Shtetit ka dalë në vendin e ngjarjes dhe në koordinim të plotë me Policinë ka ndërmarrë të gjitha veprimet e nevojshme hetimore nga vendi i ngjarjes.

Me urdhër të Prokurorit të Shtetit rasti është cilësuar “Lëndim i lehtë trupor”, sipas KPRK-së dhe në vazhdimësi janë duke u zhvilluar hetime në mënyrë intensive, me qëllim të sqarimit të rrethanave të këtij rasti, si dhe identifikimit e sigurimit të prezencës së të dyshuarve në procedurën penale”, thuhet në komunikatën e prokurorisë për media./Arbresh.info