Blloku i krahut të djathtë i Italisë është në rrugën e duhur për të fituar një shumicë dërrmuese në të dyja dhomat e parlamentit në zgjedhjet e këtij muaji, sipas sondazheve të fundit.

Partia e krahut të djathtë Vëllezërit e Italisë, e cila dominon aleancën konservatore, pritet të jetë partia më e madhe e vetme në zgjedhjet e 25 shtatorit, sipas sondazheve të fundit që tregojnë se ajo po zgjeron epërsinë ndaj Partisë Demokratike (PD) të qendrës së majtë, transmeton portal arbresh.info

Një studim i Institutit Cattaneo, bazuar në sondazhet e kryera deri më 31 gusht, tregon se blloku konservator mund të ketë të paktën 258 nga 400 përfaqësues në Dhomën e Përfaqësuesve dhe 131 nga 200 në Senat.

Ka një probabilitet prej 91.5 për qind që aleanca, e cila përfshin Vëllezërit e Italisë të Giorgio Melonit, Ligën e Matteo Salvinit dhe Forza Italia të Silvio Berlusconit, të ketë një shumicë absolute në të dy dhomat e parlamentit.

Sipas sondazhit, qendra e majtë e drejtuar nga Enrico Letta, do të ketë 88 deputetë në dhomën e ulët dhe 44 në Senat, ndërsa pjesa tjetër e vendeve do të ndahet mes partive jashtë këtyre blloqeve kryesore.

Sondazhi i fundit i Ipsos, i publikuar nga e përditshmja Corriere della Sera, tregon se partia Vëllezërit e Italisë mund të llogarisë në mbështetjen e 25.1 përqind të votuesve, PD 20.5 përqind, Lëvizja Pesë Yjet 14.5 përqind dhe Liga 12.5 përqind votuesve./arbresh.info/