Ministria e Punëve të Jashtme dhe Diasporës  (MPJD) ka konfirmuar për arbresh.info se i është përgjigjur pozitivisht kërkesës së kryeministres së Serbisë Ana Bërnabiq për vizitë të hënën në Kosovë.

Lajmin për arbresh.info e ka konfirmuar zyrtarja për informim në MPJD-së, Qëndresa Fazliu.

“Ministria e Punëve të Jashtme dhe Diasporës në Qeverinë e Republikës së Kosovës, i është përgjigjur pozitivisht kërkesës së kryeministres së Serbisë, Ana Bërnabiq që ta vizitojë Kosovën me datën 5 shtator 2022. Dhënia e lejes për vizitë bazohet në marrëveshjen lidhur me vizitat e ndërsjellta të përfaqësuesve politikë mes Republikës së Kosovës dhe Serbisë”, tha Fazliu.

Ndryshe, e ashtuquajtura “Zyra për Kosovën” në Qeverinë e Serbisë ka bërë të ditur se këtë vizitë po e bëjnë publike 72 orë më herët siç thotë marrëveshja për vizita zyrtare.

Të hënën, më 5 shtator , gjatë një vizite njëditore në Kosovë, Bërnabiq do të vizitojë Mitrovicën e Kosovës, Zveçanin dhe Leposaviqin.

Kjo do të jetë vizita e parë e Ana Bërnabiqit në Kosovë që nga viti 2017, kur ajo u zgjodh për herë të parë kryeministre e Serbisë./arbresh.info/