Ish-kryetarit i komunës së Kamenicës, Qëndron Kasatratit i është dhënë e drejta nga Gjykata Supreme për reformen në arsim, i cili në kuadër të kësaj reforme i kishte mbyllur pesë shkolla.

Gjykata Supreme e ka vërtetuar aktvendimin e Gjykatës së Apelit, dhe ka vendosur në favor të ish-kryetarit të Kamenicës Qëndron Kastrati, i cili në kuadër të reformës në arsim i kishte mbyllur pesë shkolla në disa fshatra të komunës së Kamenicës.

Këto pesë shkolla të cilat ishin mbyllur me vendim të ish-kryetarit Kastrati ishin hapur pastaj nga kryetari aktual i Kamenicës.

Kastrati i ka bërë thirrje, kryetarit të Kamenicës, ta zbatojë vendimin e Gjykatës Supreme, sepse në të kundërtën sipas tij do ta ndjek penalisht atë.

“Ministrja e Arsimit mund ta ketë edhe mbështetjen e mbretit por askush në Kosovë nuk është mbi ligjin dhe parimet e demokracisë. Këta flasin për PISA por të vetmen iniciativë serioze që adresonte problemin e kualitetit në arsim tentuan ta pengojnë me çdo kusht. E ftoj Kryetarin e Komunës së Kamenicës ta zbatojë vendimin. Në të kundërtën do të detyrohem ta ndjek penalisht”, ka shkruar Kastrati në Facebook.

Në vitin 2020, atëherë kryetar i Komunës së Kamenicës, Qëndron Kastrati, kishte tentuar ta reformojë arsimin në komunë, duke marrë vendim për mbylljen e shkollave në të cilat vijohej mësimi me më pak se 20 nxënës.

Menjëherë pas këtij vendimi, Kastrati hasi në sfida të ndryshme.

Një pjesë e konsiderueshme e prindërve, refuzuan ta respektojnë këtë vendim, e si pasojë një numër i madh i nxënësve nuk e vijonin mësimin në shkollat të cilat i kishte transferuar komuna.

Grupit të prindërve të pakënaqur iu kishin bashkuar edhe një pjesë e mësimdhënësve, duke e vështirësuar edhe më shumë reformën e nisur nga Komuna e Kamenicës.

Me gjithë këto presione, Kastrati nuk u tërhoq nga vendimi i tij për reduktim të shkollave.

Kjo bëri që në Kamenicë të organizohen protesta nga prindërit e pakënaqur, të cilët vazhdonin që ta bojkotonin mësimin sipas reformës.

Prindërit ankoheshin për mungesë të transportit dhe vështirësive për udhëtim nga fshatrat në qytet, edhe pse kryetari i komunës atëherë ia kishte siguruar transportin të gjithë nxënësve që detyroheshin të udhëtonin.

Por, edhe pas kësaj zgjidhje, prindërit nuk u dorëzuan, ata vazhduan t’i rezistonin vendimit për reformë.

Në mars të vitit 2020, Ministria e Arsimit, kishte marrë vendim për organizim të përshpejtuar të mësimit për 441 nxënës në Kamenicë, të cilët gati dy vjet nuk kishin vijuar mësimin për shkak të reformave arsimore./arbresh.info/