Shefi i Grupit Parlamentar të AAK-së, Besnik Tahiri, përmes një postimi në rrjetin social Facebook, ka reaguar pasi ministri i Punëve të Brendshme, Xhelal Sveçla, njoftoi se kanë proceduar në konsultime paraprake Projektligjin për zyrtarët publikë.

Tahiri këtë projektligj e ka quajtur sulm mbi administratën shtetërore.

“Duke e lexuar Projektligjin e ri për zyrtarët publikë, jam i tmerruar me provizionet që parapërcaktojnë dhe lejojnë hapësirë për ndërhyrje politike në administratë publike”, ka shkruar ai.

“Ky Projektligj qenka një sulm i drejtpërdrejtë ndaj administratës shtetërore dhe shërbimit civil pa përjashtim. Është kundër gjithëçkaje që është arritur me BE-në dhe Sigma në dekadën e fundit”.

Sipas tij, Neni 46, Neni 66 dhe Neni 98 te dispozitat kalimtare janë nene kundërkushtetuese.

“Projektligji i ri për zyrtarët publikë, respektivisht Neni 46, Neni 66 dhe Neni 98 te dispozitat kalimtare janë qartazi nene kundërkushtetuese, që në esencë janë fshesë e hekurt kundër menaxhmentit drejtues të administratës shtetërore. Ky Ligj nuk duhet të kalojë, assesi!”, ka përfunduar Tahiri./arbresh.info/

LEXO EDHE

Procedohet Projektligji për Pagat dhe ai për Zyrtarët publikë