Problemi i vonesave dhe anulimeve të fluturimeve në Gjermani , që po ndodh për shkak të mungesës së fuqisë punëtore, nuk ka gjasa të zbutet kaq shpejt, tha Ministri i Transportit Volker Wissing, ndërsa kompania ajrore Lufthansa ka shpallur “një verë kaotike”.

“Situata në sistemin evropian të transportit ajror është një sfidë e madhe për të gjithë,” tha Wissing për Bild, duke shtuar se një zgjidhje për mungesën e fuqisë punëtore nuk ka gjasa të gjendej së shpejti, transmeton portal arbresh.info

Gjatë javëve të fundit, në disa aeroporte europiane ka mbretëruar një kaos, duke reflektuar një rritje të ndjeshme të kërkesës për pushime jashtë vendit.

Në Dublin, disa pasagjerë kanë pritur me orë të tëra për të hyrë në terminale.

Ekspertët tregojnë për mungesat e fuqisë punëtore pas mbylljes së udhëtimeve ajrore për shkak të koronavirusit. Linja ajrore gjermane Lufthansa raportoi se planifikon të anulojë rreth 900 fluturime në aeroportet në Mynih dhe Frankfurt vetëm në korrik.

Sipas sindikatës gjermane Verdi, mungesa e punëtorëve që kryenin kontrollin e sigurisë, kontrollin dhe trajtimin e bagazheve goditi aeroportet më të rënda si Frankfurt, Hamburg, Berlin dhe Dyseldorf.

Situata vetëm do të përkeqësohet, sipas Christine Behle, nënkryetare e bordit mbikëqyrës të Lufthansa.

“Vera do të jetë kaotike,” tha Behle për Augsburger Allgemeine, duke pranuar se për shkak të konkurrencës së ashpër nga aeroportet, kostot e pagave janë ulur midis 30 dhe 40 për qind.

“Kompanitë e shërbimeve publike pushuan nga puna punëtorët gjatë bllokimit të pandemisë, të cilët po kërkonin punë të tjera, shtoi Behle. Këta punëtorë na duhen tani dhe urgjentisht, pasi numri i rezervimeve po rritet ndjeshëm përsëri”, theksoi ajo./arbresh.info/