1. Edhe pas një jave që ZRRE-ja e njoftoi publikun për rritjen e tarifave të energjisë, ende nuk është bërë publik vendimi së bashku me arsyeshmërinë e tij. Dua të besoj se analiza në të cilën është bazuar vendimi është bërë paraprakisht, e jo të bëhet tani për të arsyetuar vendimin.

2. KESCO kërkon që tarifat e reja të hyjnë në fuqi nga 1 marsi, por ZRRE-ja insistion që vendimi të zbatohen nga data 9 shkurt!!! E çuditshme.

3. Në raportin e saj për konsultim publik, ZRRE-ja e arsyetonte nevojën që shpenzimet e lejuara të ndërmarrjeve të sektorit të energjisë të rriteshin nga 314 milionë euro në 446.7 milionë euro, një rritje prej 132.7 milionë euro apo 42%. Në atë raport tarifat e reja ishin propozuar të rriteshin për 9%, e cila rritje së bashku me subvencionimin e qeverisë do të mbulonte diferencën prej 132.7 milionë euro.

Por, në njoftimin e ZRRE-së, shpenzimet e lejuara shkuan në 566 milionë euro, një rritje prej 252 milionë euro apo 80%.

Nuk ka asnjë arsyetim pse ky ndryshim kaq i madh në shpenzimet e lejuara. Publiku i gjerë ka dhënë komente bazuar në raportin konsultativ të ZRRE-së. Çfarë ka ndodhur për dy javë që të rriten kaq shumë shpenzimet e lejuara? Çfarë përfshihet në këtë shumë? Pse kjo rritje kaq e madhe kur subvencionimi i qeverisë është shumë gjeneroz? Këto janë çështje me interes për publikun. Prandaj duhet sa më parë të publikohet vendimi i ZRRE-së me arsyetimin e tij.