Agjencia Kosovare e Privatizimit me 3 shkurt nën asistimin e Policisë së Kosovës kanë shkuar në zyrat e Ndërmarrjes “AgroKosova Holding”, me ç’rast kanë marrë nën administrim këtë ndërmarrje.

Drejtori i Ndërmarrjes “AgroKosova Holding”, Haziz Tafaj në RTV Dukagjini thotë se ajo që mori AKP ishte një veprim i papritur dhe i paligjshëm.

“AKP duke përdorë edhe dhunën policore nuk na dha asnjë mundësi madje as të bëjmë pranim-dorëzimin e asaj që e kemi lënë aty apo t’i marrim edhe gjërat tona personale. Neve dhe 300 punëtorëve të Ndërmarrjes “AgroKosova Holding” na kanë lënë jashtë”, tha ai, përcjell Telegrafi.

Pavarësisht kësaj, Agjencia Kosovare e Privatizimit, përmes njoftimit për media u ka bërë thirrje të gjithë punëtorëve aktual, të të gjitha profileve, të cilët kanë marrëdhënie pune në ndërmarrjen e re “AgrokKosova Holding” të vazhdojnë punën dhe të mos largohen nga vendet e punës.

AKP ka thënë se do të vazhdoj aktivitetin e ndërmarrjes me punëtorët aktual të cilët do të lidhin marrëdhënie pune me AKP-në.