Kina reagoi të enjten për vendosjen e sanksioneve nga SHBA ndaj katër firmave farmaceutike kineze që prodhojnë qetësues kundër dhimbjeve dhe një personi për prodhimin e supozuar të steroideve anabolike dhe shitjen e përbërësve të fentanilit, transmeton Anadolu Agency.

Zëdhënësi i Ministrisë së Jashtme Wang Wenbin në një konferencë shtypi tha se qeveria e tij miraton një qasje të “tolerancës zero” për çështjen e narkotikëve, me masa të rrepta për të rregulluar anestetikët, psikotropët dhe kimikatet pararendëse.

“Përpjekjet dhe arritjet e Kinës janë dëshmuar nga komuniteti ndërkombëtar. Kina kundërshton kategorikisht aktet e gabuara të SHBA-së”, tha ai.

“Ne i bëjmë thirrje SHBA-së të respektojë faktet dhe të kërkojë nga brenda shkaqet e abuzimit të fentanilit. Ajo duhet t’i shohë përpjekjet e Kinës në një mënyrë objektive dhe të drejtë, në vend që të largojë vëmendjen duke fajësuar të tjerët”, shtoi zëdhënësi i ministrisë.

Presidenti i SHBA-së Joe Biden nënshkroi një urdhër ekzekutiv të mërkurën duke vendosur sanksione ndaj katër kompanive farmaceutike dhe Chuen Fat Yip, të cilin ai e përshkroi si “një nga prodhuesit më të mëdhenj, nëse jo më të madhin, të steroideve anabolike në botë”.