Bashkimi Evropian planifikon të ndalojë financimin e naftësjellësve dhe gazsjellësve, pasi po e drejton fokusin në promovimin e burimeve të energjisë që janë më pak të dëmshme për klimën.

Negociatorët nga vendet anëtare të BE-së dhe Parlamentit Evropian ranë dakord sot për një reformë të rregullores TEN-E që rregullon zgjerimin e rrjeteve ndërkufitare të energjisë.

Rregullorja e rishikuar vendos prioritete të reja në prodhimin e energjisë për arritjen e objektivave të BE-së për klimën, për të promovuar rrjetet e energjisë elektrike, linjat për të ashtuquajturat ”fermat e erës” në det të hapur dhe për gazrat miqësore me klimën, si hidrogjeni.

Projektet e reja që përdorin ekskluzivisht naftë fosile ose gaz natyror mund të mos marrin më mbështetjen e BE-së në të ardhmen.

Financimi do të sigurohet përmes atyre që njihen si projekte me interes të përbashkët (PCI), të cilat mund të miratohen më shpejt dhe të mbështeten me paratë e BE-së.

Komisioni Evropian prezantoi një listë të re PCI në nëntor.

Megjithatë, ai ende përfshin projektet e gazit që ishin pjesë e një liste të mëparshme, si tubacionet e gazit të planifikuar tashmë për Maltën ose Qipron, duke shkaktuar kritika nga organizatat mjedisore, pasi këto mund të financohen ende nga fondet e BE-së, edhe pse gazi si lëndë djegëse fosile lëshon gazra serë.

Këto vendime ende duhet të konfirmohen nga Këshilli i Shteteve të BE-së dhe Parlamenti Evropian, një hap që konsiderohet formal.

BE-ja synon të ulë emetimet e saj me të paktën 55 për qind deri në vitin 2030 në krahasim me vitin 1990 dhe kërkon të bëhet neutrale ndaj klimës deri në vitin 2050./atsh