Japonia dhe Rusia janë dakorduar për vazhdimin e negociatave për marrëveshjen e paqes pas luftës mes dy vendeve, transmeton Anadolu.

Ministri i Jashtëm japonez, Yoshimasa Hayashi në një bisedë telefonike me ministrin e Jashtëm të Rusisë, Sergey Lavrov diskutoi për zhvillimet dypalëshe dhe ato rajonale.

Gjatë bisedës dy ministrat u dakroduan për vazhdimin e negociatave të paqes pas luftës.

Në një deklaratë nga Ministria e Jashtme e Japonisë thuhet se dy liderët negociuan çështjet dypalëshe, përfshirë edhe situatën e aktiviteteve ekonomike në rajonin e Ishujve Kuril.

Hayashi tha se dëshiron të zhvillojë marrëdhëniet politike, ekonomike dhe kulturore Japoni-Rusi “me qëndrimin e përfitimit reciprok”.

Dy ministrat diskutuan testimet e raketave balistike të Koresë së Veriut si dhe shprehën dëshirën për të zhvilluan takim ballë për ballë në një kohë të afërt.

Ministri japonez i përcolli homologut të tij rus shqetësimet e vendit të tij për tensionet në rritje kohën e fundit në Ukrainë dhe Bjellorusi.

– Problemi për Ishujt Kuril

Bashkimi Sovjetik në fund të Luftës së Dytë Botërore në vitin 1945 aneksoi Ishujt Kuril të Japonisë, që shtrihen rreth 1.300 kilometra dhe ndajnë Oqeanin Paqësor dhe Detin Ohotsk.

Palët nuk arritën rezultat në negociatat e zhvilluara për të nënshkruar marrëveshje paqeje mes Rusisë dhe Japonisë për shkak të mosmarrëveshjes për pjesën territoriale të cilën Japonia pas aneksimit i ka emërtuar si “Rajonet Veriore”.