Përpara pushimit të ndeshjeve ndërkombëtare, Superliga e Kosovës do të zhvillojë edhe xhiron e 13-të.

Kjo fundjavë do të jetë e mbushur me derbin në elitën e futbollit kosovar, por në vëmendje do të jetë derbi mes Ballkanit dhe Dritës.

Pas 12-të xhirove të zhvilluara, Drita gjendet në vendin e parë me 21 pikë, ndërsa me një më pak është Ballkani e cila pozicionet në vendin e dytë.

Mbrojtësi i Ballkanit, Armend Thaqi në një prononcim për “GazetaBlic Sport” tha se do të jetë një ndeshje e vështirë ndaj Dritës, pasi skuadra e Ardian Nuhiut ka treguar paraqitje positive në xhirot e fundit.

“Është një ndeshje e vështirë ndaj rivalit direkt dhe një ndeshje derbi. Do të jetë e vështirë sepse Drita ka treguar shumë ndeshje të mira, por pas atij rezultati zhgënjyes javën e kaluar duhet të fitojmë ndeshjen për të rikthyer qetësinë dhe pozitën e parë”, tha fillimisht Thaqi.

Më pas, ai tha se janë të vetëdijshëm për fuqinë e kundërshtarit, por do të luftojnë për fitore deri në fund të ndeshjes.

“Jemi të vetëdijshëm se do të jetë e vështirë, por ne do të luftojmë për fitore deri në fund të ndeshjeve”, përfundoi ai.

Ndeshja zhvillohet të shtunën me fillim nga ora 13:00.