Ministri i Mbrojtjes, Armend Mehaj po qëndron në Shtetet e Bashkuara të Amerikës, ku në kuadër të vizitës së tij, sot ka takuar senatorin nga shteti Arkanzas, Tom Cotton.

Cotton njëherit është edhe anëtar i Komitetit për Shërbimet e Armatosura në Senatin e Shteteve të Bashkaura.

Mehaj thotë se e ka informuar senatorin për objektivat e Qeverisë së Kosovës në fushën e mbrojtjes.

”Në kuadrin e vizitës sime në Shtetet e Bashkuara të Amerikës, sot pata nderin dhe kënaqësinë që të takoj Senatorin nga shteti Arkanzas, z.Tom Cotton, njëherit, anëtar i Komitetit për Shërbimet e Armatosura në Senatin e Shteteve të Bashkuara.

Senatorin Cotton e informova për objektivat e Qeverisë së Republikës së Kosovës në fushën e mbrojtjes dhe njëkohësisht i theksova përkushtimin tonë për thellim të partneritetit me SHBA, duke e falenderuar për gjithë kontributin dhe përkrahjen e pakursyer në të gjitha etapat e shtetndërtimit të Republikës së Kosovës, e në veçanti në krijimin dhe zhvillimin e kapaciteteve të mbrojtjes së vendit tonë.

Senatori Cotton më shprehu falenderimin dhe konsideratën e tij të lartë për gatishmërinë e treguar nga ana Qeverisë së Kosovës për asistencën e ofruar në strehimin e refugjatëve afganë. Gjithashtu vlerësoi lartë partneritetin ndërmjet SHBA-së dhe Republikës së Kosovës, si dhe konfirmoi përkushtimin e tij për thellimin e mëtejmë të këtij bashkëpunimi”./arbresh.info/