Një vajzë e re ka humbur jetën sot në një anije turistike në Vlorë. Ajo ka rrëshqitur në anije dhe është plagosur. Edhe pse është dërguar në spital, e reja nuk ka mundur që të mbijetojë. Viktima 25-vjeçare ende nuk është identifikuar, ndërsa dyshohet se është turiste e huaj.

Policia thotë se ka ndaluar 47-vjeçarin Aleksandër Golemaj, për shkelje të rregullave të mbrojtjes në punë. Fillimisht policia tha se dyshohet se vajza ka qenë nën efektin e alkolit. “Mëngjesin e sotëm është dërguar për ndihmë mjekësore, në spitalin e Vlorës, një shtetase ende e paidentifikuar, rreth moshës 25 vjeçe, e cila dyshohet të jetë rrëzuar aksidentalisht në det duke zbritur nga një anije të ankoruar pranë portit Vlorë. Paraprakisht dyshohet se kjo shtetase ka qenë nën efektin e alkoolit”. Por pasdite njoftimi i policisë nuk e pëmendte këtë.

Njoftimi i Policisë së Vlorës:

Specialistët për Hetimin e Krimeve në Komisariatin e Policisë Vlorë bënë arrestimin në flagrancë për veprën penale ‘Shkelja e rregullave të mbrojtjes në punë’ të shtetasit A. G., 47 vjeç, banues në Vlorë. Arrestimi i këtij shtetasi u bë pasi, mëngjesin e sotëm, nga anija turistike ku ishte i punësuar, dyshohet se është rrëzuar një shtetase ende e paidentifikuar, rreth 25 vjeçe, e cila për pasojë ka ndërruar jetë në spitalin e Vlorës. Vijon puna për identifikimin e saj. Materialet i kaluan Prokurorisë së Rrethit Gjyqësor Vlorë, për veprime të mëtejshëm.