Organizata Germin ka dorëzuar sot ankesën për shkeljen e të drejtës së votës për qytetarët që jetojnë jashtë vendit gjatë zgjedhjeve të parakohshme të 14 shkurtit.

Ankesa e kësaj organizate u dorëzua në zyrën e Avokatit të Popullit, bashkë me përfaqësues të zyrës së avokatëve.

Lirim Krasniqi nga Organizata “Germini” para mediave tha se kanë dërguar një ankesë për parregullsitë që janë bërë në kohën e zgjedhjeve të fundit parlamentare në Kosovë, ndaj qytetarëve që jetojnë jashtë vendit, shkruan arbresh.info.

“Ne sot kemi dërguar një kërkesë në zyrën e avokatit të popullit për të treguar parregullsitë që janë bërë në kohen e zgjedhjeve. Presim nga avokati i popullit të marr masa në drejtim të kësaj çështje”, tha Krasniqi.

Ndërkaq, Taulant Hoda nga zyra e avokatëve tha se ata e kanë parë që organizata “Germini” ka shfaqur interesim ndaj kësaj çështje dhe për këtë ata i kanë ofruar përkrahje.

“Ne e kemi parë interesimin e “Germinit” ndaj kësaj çështje dhe kemi vendosur ta përkrahim dhe presim që të gjitha ato ankesa të shqyrtohen seriozisht”, u shpreh avokati Hoda para mediave.

Ndryshe, zgjedhjet e përgjithshme në vend u mbajtën më 14 shkurt 2021, ku fituese e zgjedhjeve doli Lëvizja Vetëvendosje ./arbresh.info/