Organizatat jo qeveritare kanë kundërshtuar vendimin e Qeverisë së Kosovës për heqjen e primit të sigurimit kufitar apo siç njihet “Kartoni i Gjelbër”, nga 1 korriku e deri në fund të vitit.

Këto organizata e kanë quajtur të paarsyeshëm këtë vendin të Qeverisë.

“Ne e shohim këtë vendim të Qeverisë si të pamatur dhe palogjikshëm në kontekstin social e politik në të cilin gjindemi. Pavarësisht fuqisë së madhe politike që i lejon për të marrë vendime të tilla, Qeveria duhet të tregohet e matur dhe serioze, duke i shmangur vendimet populiste dhe të ngutshme që e fusin shtetin e Kosovës në obligime që në këtë periudhë nuk do të duhej të ishin parësore, duke e marrë parasysh mirëqeninen e ulët ekonomike në vend”, thuhet në këtë reagim.

Gjithashtu, ata e kanë konsideruar këtë vendim si tendencë për keqpërdorim të parasë publike.

“Ky vendim është tendencë e qartë për keqpordorim të parasë publike përmes financimit nga buxheti i Republikës, buxhet i cili në asnjë rrethanë nuk i dedikohet subvencionimit të shërbimeve të shtrenjta të sigurimit të autopërgjegjësisë që rezulton nga veprimi privat i ngasësve të tyre. Për më tepër, buxheti është rrjedhojë e një kontributi të një shumice të varfër të qytetarëve, e i cili reflekton detyrimin për shpenzimin maksimalisht racional dhe vetëm për objektiva që janë të domosdoshme e që kanë për qëllim një ineteres publik të Republikës”.

Tutje, këto organizatat jo qeveritare kanë thënë se Qeveria e Kosovës nëpërmjet Byrosë Kosovare të Sigurimit duhet të bëjë përpjekje konkrete që ta fus Kosovën në Kartonin e Gjelbër, e jo të ndërmarrë veprime që shkaktojnë shpenzime luksi në kurriz të qytetarëve.