Presidenti i Shteteve të Bashkuara të Amerikës, Joe Biden, do të bëjë të ditur të premten, administrimin e 300 milionë dozave të vaksinës anti-COVID, brenda 150 ditëve të administratës së tij, ka bërë të ditur Shtëpia e Bardhë.

Derisa do të flasë për arritjet e tij duke ulur numrin e rasteve të reja dhe vdekjeve këto kohë si pasojë e koronavirusit, presidenti Biden po ashtu pritet të deklarojë se “ka ende shumë punë për tu bërë”.

Bideni i ka vënë qëllim vetes, që deri më 4 korrik të këtij viti, SHBA-ja të ketë 70% të popullatës që kanë marrë të paktën një dozë dhe 160 milionë të rritur që janë vaksinuar me të dy dozat e vaksinës anti-COVID. Ende nuk dihet nëse kjo do të arrihet.

Deri më tani, 65% e të rriturve amerikanë e kanë marrë njërën dozë të vaksinës, ka bërë të ditur Qendra për Kontrollin dhe Parandalimin e Sëmundjeve. Sipas kësaj qendre, 147.8 milionë qytetarë amerikanë kanë marrë të dy dozat.

Vetëm 14 shtete amerikane kanë arritur deri më tani qëllimin e caktuar nga Bideni, ka bërë të ditur po ashtu Qendra për Kontrollin dhe Parandalimin e Sëmundjeve.