Kryeministri, Albin Kurti, që me gjasë do të përballet me presidentin e Serbisë, Aleksandar Vuçiq, në negociatat e ndërmjetësuara nga Bashkimi Evropian për normalizim të marrëdhënieve, la të nënkuptohet se në Bruksel nuk do të flasë për Asociacionin e Komunave Serbe.

“Takim i parë, dhe aty do të shohim çfarë mund të jetë kapitulli i ardhshëm i dialogut. Është takim për dialogun e ardhshëm por nuk është vazhdim i dialogut të mëhershëm”, deklaroi Kurti para medieve.

Por, paraditen e sotme, presidenti serb, Aleksandar Vuçiq deklaroi se Kurti nuk ka nevojë “të  niset për Bruksel nëse nuk vjen për Asociacionin”.

Asociacioni është zotim që kanë nënshkruar liderët e mëhershëm qeveritarë, por që asnjëherë nuk u zbatua.

Për kryeministrin Kurti, takimi që pritet të mbahet në gjysmën e qershorit, është hera e parë që do ta ketë përballë Vuçiqin, duke mos përfshire takimin në mesin e rreth 30 pjesëmarrësve në konferencën e sigurisë ne Mynih.

“Do ta kemi një diskutim në Kuvend për gjendjen e deritanishme të procesit të dialogut të kaluar. Për të parë ku ndodhemi sa i përket marrëveshjeve të kaluara, zbatimit të tyre dhe ndikimit të tyre”, deklaroi Kurti kur u pyet për platformën e dialogut të kërkuar nga opozita./arbresh.info/

Vuçiq: Nëse Kurti s’vjen për ‘Zajednicën’ në Bruksel, mos të vijë fare – Arbresh.info