Deputeti i Lëvizjes Vetëvendosje, Arbër Rexhaj i është përgjigur kreut të LDK-së, Lumir Abdixhikut i cili tha se shteti nuk funksion me dollapë, kur u pyet për deklaratën e zëvendëskryeministri, Besnik Bislimi, i cili tha se kanë hallakatur çdo cep në Qeveri – të katit të dytë dhe të tretë  ‘për të parë mos janë mshefë dosjet e marrëveshjes’.

Rexhaj tha se Abdixhiku është i ri në politikë dhe se historia e dialogut Kosovë-Serbi nuk është në 20 faqe.

“E para, zotëri Abdixhiku është i ri në politikë, e dyta ndoshta nuk ka informacion se si ka ardhë puna, mendoj që historia e dialogut Kosovë-Serbi nuk është në 20 faqe. Ne po kërkojmë çdo gjë e cila me plot kuptimin e fjalës ka ndodhur mes delegacionit të Kosovës që e kryesonte zotri Hoti, ka mungu transpareca e plotë. Nuk po themi që kanë fshehur diçka, por dialogu nuk është në 20 faqe”, tha Rexhaj.

Abdixhiku duke qeshur kishte thënë se deklarata e Bislimit është hajgare, sepse sipas tij, shteti nuk funksion me dollapë, por të gjitha thotë se janë dorëzuar në ditën e pranim-dorëzimit të detyrës.

“Nuk është e vërtetë. Kjo është hajgare qysh keni kontrolluar dollape, shteti nuk funksion me dollapë, dokumetet kanë numër portokolle, kanë vulë. Nuk është shtëpi nuk është podrum. Është padituri e madhe ju lutem. Nuk lëvizen raftet në Qeveri për të gjetur dokumente”, tha Abdixhiku.

Po ashtu ai tha se në rast se Qeveria e Kosovës ka pasur të pyes diçka, atëherë është dashur të kontaktojnë me LDK-në, pasi sipas tij, dokumentet nuk mund të fshehen.