Në Prishtinë vendosen posterë kundër Donika Gërvallës

19:47 | 6 Maj 2021
Përparim Bublaku

Disa posterë kundër ministres së Jashtme të Kosovës, Donika Gërvalla, kanë nisur të vendosen në rrugët e Prishtinës.

Me shkrimin “Ministre e Kurtit, dëshmitare e Vukçit!” është aluduar në reagimet e fundit që opozita ka bërë ndaj ministres Gërvalla, për deklarata të mëhershme, kur pati thënë se disa nga ish-krerët e Ushtrisë Çlirimtare të Kosovës kanë bërë krime ndaj kundërshtarëve politikë.

Nuk dihet kush i ka vendosur këta posterë.

Sot Gërvalla, në një konferencë për media, mohoi se ka qenë apo është dëshmitare në Gjykatën Speciale ndaj ish-krerëve të UÇK-së.

E për këtë çështje, sot u debatua edhe në seancën e Kuvendit të Kosovës me Gërvallën që u kritikua nga partitë opozitare, e që më pas situata u tensionua duke iu afruar përleshjeve.